گِلوئي

گِلوئي /Acanthodactylus cantoris / Indian Fringe-fingered Lizard, Giloee



ڪِرڙيءَ جي ڪٽنب جو ھي جانور ڏکڻ افغانستان، پاڪستان کان اتر اولھه ھندستان تائين پکڙيل آھي. ان جا چنبا عام ڪرڙين کان ڪي قدر مختلف ۽ جھالر نما ويڪرا ٿيندا آھن. ھن جنس کي ريگ ماھي چوڻ درست نه آھي ڇو ته ريگ ماھي اصل ۾ Ophiomorus جنس جي چمڪدار ڪرڙي ٿئي ٿي، پر اِبن بطوطه جنھن ڪِرڙيءَ کي سيوھڻ لڳ ماڻھن جي خوراڪ ۾ شامل ڏسي ڪرھت کاڌي ھئي ۽ ريگ ماھي يا سقنقوره چيو ھو، اھا گِلوئي ٿي سگھي ٿي. اڄ به سنڌ جا ڪي شڪاري قبيلا گلوئيءَ کي حلال ۽ کائڻ جو جانور سمجھندا ۽ شوق سان پڪڙي کائيندا آھن. پاڪستان ۾ Acanthodactylus ڪٽنب جا ڪافي قسم آھن جن مان A. cantoris تمام عام آھي. اھا صحيح معنيٰ ۾ وارياسي ڪِرڙي (Sand lizard) آھي. پاڪستان ۾ چار صحرا آھن. اھا جنس ھر جاءِ تي آھي. جيت خور آھي ۽ ٻِـرن ۾ آنا ڏيندي آھي.