ابڙو اڪيڊمي Abro Academy
2020-11-05
داخلا نمبر 1022
عنوان ڳالهه جڏهن پاڻ تي آئي......
شاخ ڪشالو ڪيچ ڏي: ايڊيٽوريل-1روزاني برسات ڪراچي
پڙهيو ويو 1296
داخلا جو حوالو:
هن داخلا جون تصويرون نه مليون
ڳالهه جڏهن پاڻ تي آئي......
سيما زرين نالي ايم ڪيو ايم جي هڪ سرگرم خاتون جي گرفتاري، آزادي ۽ سندس پريس ڪانفرنس جا تفصيل ٻڌي ڏک ٿئي ٿو. تشدد ڪنهن تي به ٿئي ۽ لڙڪ ڪنهن جي به اک مان ڇو نه ڪري! سڄي انسانيت لاءِ ڏک جي ڳالهه آهي پر اها خبر ان کان به وڌيڪ ڏک جي آهي ته ايم ڪيو ايم پنهنجين سرگرمين ۾ عورتن کي ان حد تائين ملوث ڪري ڇڏيو آهي جو انهن کي دهشتگرديءَ جي تربيت ملڻ جون خبرون آيون آهن ۽ رياستي ادارا عورتن کي گرفتار ۽ تشدد ڪرڻ تي مجبور ٿيا آهن. ايم ڪيو ايم ڀلي ته ڪيتريون به صفايون پيش ڪري، اها پاڻ کي ان مهل تائين امن پسند تنظيم ثابت ڪري نٿي سگهي جيستائين عدالتون انهن ڪيسن جو فيصلو نٿيون ڏين جيڪي ان جي ڪارڪنن جي خلاف داخل ٿيل آهن. ايم ڪيو ايم دهشتگرديءَ دوران جڏهن عورتن کي ڍال بڻايو آهي ته لازمي طور تي عورتون به زخم کائينديون. سيما زرين قبول ڪري ٿي ته هوءَ اهو رڪارڊ مرتب ڪندي آهي جيڪو ايم ڪيو ايم جي قتل ٿيل ۽ گرفتار ڪارڪنن جو آهي. اهو ڪو ڏوهه نه آهي پر جڏهن اهي ڪارڪن بيشمار بيگناهن جا قاتل هجن، تڏهن انهن سان پاڻ کي وابسته رکڻ کانپوءِ اها توقع ڪرڻ ته عورت هجڻ جي ناتي کيس هر ڏوهه ثواب معاف هوندو، غلطي آهي. قانون سڀني لاءِ برابر آهي پر عورت جو احترام به اهم آهي. سيما زرين کي، سندس مائٽن کي ۽ سيما زرين جهڙين ٻين خواتين کي به سمجهڻ گهرجي ته کين هڪ اوڙاهه ۾ اڇلايو پيو وڃي، کين اهو به ياد رکڻ گهرجي ته خواتين فقط سيما زرين، رئيس فاطمه، فرزانه سلطان، شازيه، بيگم شائسته ۽ ڀاڀي حميرا ئي ڪو نه آهن، اهي سڀ به خواتين آهن جن جا پٽ، ڀائر، پيئر ۽ ور ايم ڪيو ايم جي دهشتگردن هٿان بي موت ماريا ويا. انهن خواتين جي لڙڪن جو حساب ڪير ڏيندو؟