ابڙو اڪيڊمي Abro Academy
2020-11-05
داخلا نمبر 1053
عنوان ڳالهين جي نائين دور کانپوءِ به.....
شاخ ڪشالو ڪيچ ڏي: ايڊيٽوريل-1روزاني برسات ڪراچي
پڙهيو ويو 1205
داخلا جو حوالو:
هن داخلا جون تصويرون نه مليون
ڳالهين جي نائين دور کانپوءِ به.....
ايم ڪيو ايم جو هڪ نڪاتي فارمولو، اخباري پڌارين موجب رد ٿي چڪو آهي پر ان جي تصديق انڪري نٿي ڪري سگهجي جو جيڪا ڳالهه مهڙ ۾ ئي ”خفيه“ رکي وئي، هاڻي ان جي رد ٿيڻ جي ڳالهه تي ڪيئن اعتبار ڪجي! اها به عجيب ڳالهه آهي ته حڪومت ايم ڪيو ايم جي فارمولي کي رد ڪري ۽ ايم ڪيو ايم جي مذاڪراتي ٽيم جو لهجو پوءِ به ٿڌو هجي! هڪ نڪاتي فارمولي جي انجام بابت چيو ويو، ”هڪ نڪاتي فارمولو رد، حڪومت به پهرين ڪراچيءَ ۾ امن قائم ڪرڻ جي شرط تان هٿ کڻي وئي!“
جيڪڏهن حڪومت امن کي اوليت ڏيڻ تان هٿ کڻي وئي آهي ته پوءِ باقي ڇا بچيو آهي جنهن تي ڳالهائبو؟ هاڻي نئين سر21 ۽ 18 نڪتا ”غور هيٺ“ آهن. ڳالهيون اتي ئي بيٺيون اهن جتي پهرين ڏينهن تي بيٺل هيون. اهو درست آهي ته ڪي سوليون ڳالهيون ڪو نه آهن، ڳالهين ۾ وقت لڳندو آهي پر هي ڳالهيون هاڻي شيطان جو آنڊو ٿي ويون آهن جيڪي کٽن ئي نٿيون!
عوام کي نتيجا گهرجن ڇاڪاڻ ته شهر ۾ ڪهرام متل آهي. ماڻهن جي موت جي شرح جيڪا ٻه هفتا اڳ پنج ماڻهو روز هئي هاڻي ٻيهر وڌي وئي آهي. ايم ڪيو ايم ڳالهين جي ڪاميابيءَ کان اڳ امن جي ضمانت نٿي ڏئي جنهن مان صاف ظاهر آهي ته ”امن جي ڪنجي“ ايم ڪيو ايم جي هٿ ۾ آهي. بظاهر ته ايئن ٿو لڳي ته ڪراچيءَ جي مسئلي تي ٽه طرفو ڪم ٿي رهيو آهي. ايم ڪيو ايم ماڻهو ماري رهي آهي، وزير داخله نصير الله بابر ”آپريشن ٿئيٽر ۾ جراحي“ ڪري رهيو آهي ۽ انهن ٻنهي قوتن جا ”سياسي چهرا“ هڪ ٽيبل تي ويهي هڪ ٻئي سان گڏ قوم کي پرچائڻ ۾ مصروف آهن پر هر ڳالهه ٻڙيءَ تي بيٺي آهي.
شهرين جي آڏو سوال فقط امن امان ۽ روزگار جي بحاليءَ جو آهي، جيستائين دهشتگردن وٽ لاش ڪيرائڻ جي طاقت آهي. هو ڳالهين ۾ مات ڪو نه کائيندا. ايم ڪيو ايم ڳالهين جي دوران هڪ ٻي هڙتال جو سڏ ڏنو آهي. هنن الٽيميٽم ڏيڻ شروع ڪيا آهن. اڄوڪي تاريخ واري هڙتال جو سڏ ڪالهه شام 3 بجي تائين ڏنل الٽيميٽم سان ڳنڍيل هو. الٽيميٽم جا مطالبا ڇا هئا؟ نئين ڪراچيءَ جو گهيرو ڪندڙ اهلڪارن جي خلاف ڪارروائي ۽ ايم ڪيو ايم جي ڪارڪن عورتن کي ان مقرر وقت جي اندر هٿ ڪرڻ. هڙتال لاءِ بنياد ڪي نوان ڪو نه آهن. اڳ به ايئن ئي هڙتالون ڪرائي، ماڻهو ماري، دهشت پکيڙي، مذاڪراتي ٽيم کي سوديڪاريءَ لاءِ طاقت ڏني وئي. ڳالهه کي جيترو کوٽجي کوٽي سگهجي ٿو پر بار بار هڪ ئي جواب اچي ٿو ته ايم ڪيو ايم ان مهل تائين دهشتگردي ڇڏڻ لاءِ تيار نه آهي جيستائين ان جا سنڌ جي هڪ حصي تي گرفت جا مطالبا پورا نٿا ٿين. ان کانپوءِ حڪومت کان پڇڻ لاءِ فقط هڪ ئي سوال بچي ٿو ته ان صورت ۾ توهان وٽ ڪهڙي واٽ آهي؟