”آسمان“ ايمنسٽي انٽرنيشنل جو هيڊ ڪوارٽر ناهي

”آسمان“ ايمنسٽي انٽرنيشنل جو هيڊ ڪوارٽر ناهي

عام ماڻهن جو ڪهڙو ڏوهه آهي جو اجايو مٿن الزام هڻجي ته سندن قول ۽ فعل ۾ تضاد اچي ويو آهي ۽ هو جيڪي چون ٿا، سو ڪن نٿا. ماڻهو ته اهو ئي ڪندا جڪو سندن اڳواڻ ڪري ڏيکاريندا. ميان نواز شريف ڪيڏي وقت کان چوندو پيو اچي ته ”ضرورت پئي ته ملڪ لاءِ جان جو نذرانو پيش ڪندس.“ پر اڄ تائين نذرانو پيش نه ڪيو اٿائين ۽ نه ڪندو. يا ته پاڪستان ۾ اڃا اهڙو وقت ڪو نه آيو آهي جو ميان صاحب کي جان قربان ڪرڻي پوي يا ته وري پاڪستان کي ڪنهن بهتر ماڻهوءَ جي قرباني گهرجي ۽ تاريخ نواز شريف کي ”بهتر ماڻهن، جي لسٽ کان ٻاهر رکيو آهي. هونئن به سياستدان قربانيون ڏيندا نه آهن، وٺندا آهن.
ميان نواز شيف جي مسلم ليگ ۽ ايم ڪيو ايم ”ڪارو ڏينهن“ ملهايو پر ڪهڙي طرح؟ الطاف حسين هميشه وانگر ايترو پري لڪو ويٺو آهي جو اوستائين ڪنهن مخالف جي اک به نه پهچي ۽ ميان نواز شريف لنڊن ۾ ڪارو ڏينهن ملهايو جو سيد عبدالله شاهه کي اهو چوڻ جو وجهه ملي ويو ته ”نواز شريف ڊرائنگ روم ۾ ويهي ڪارو ڏينهن ملهايو.“ ان ڏينهن تي سڄي حزب اختلاف مظاهرا ڪرڻ جا پروگرام ڪيا پر ڪراچيءَ جي ماڻهن شڪر ڪيو ته ڏينهن ڪارو نه ٿيو ۽ ماڻهن جو ڪاروبار متاثر نه ٿيو، ڪاري ڏينهن جا منتظم جلسن ۾ ويهي دعا گهرندا رهيا ته ”الله ظالمن کان نجات ڏي!“ زمين سان گڏ آسمان به ڏسي رهيو آهي ته ظالم ڪير آهي ۽ ظلم ڪنهن تي ٿي رهيو آهي؟ آسمان ”ايمنسٽي انٽرنيشنل، جو هيڊ ڪوارٽر نه آهي جيڪو ايم ڪيو ايم جي پريس رليزن جي بنياد تي ظالم ۽ مظلوم جو تعين ڪري ۽ اکيون پوري فيصلو ڏي. ظلم کي نيٺ ختم ٿيڻو آهي ۽ خدا ڪندو ته اها دعا به قبول ٿيندي ۽ ظالم ضرور ختم ٿيندا. ضروري نه آهي ته ظالم اهو هجي جيڪو مسلم ليگي ۽ ايم ڪيو ايمي سمجهن ٿا، ظالم اهو ئي آهي جيڪو فتني جو بنياد آهي. ايم ڪيو ايم سمجهن ٿا، ظالم اهو ئي آهي جيڪو فتني جو بنياد آهي. ايم ڪيو ايم سان گڏ پيپلز پارٽي سميت سڄو ملڪ دعاگو آهي ته ظالمن ۽ منافقن جي پاڙ پٽجي ۽ دهشتگرديءَ جا ڏينهن پورا ٿيا.