”سسٽم“ جي بھتريءَ لاءِ اسٽالن گهرجي!

سسٽم بحال ڪري ڏيندا؟ آئون ڪيترو بہ رحمدل جمهوريت پسند ڇو نہ هجان پر جيڪڏهن سسٽم نافذ ڪرڻو آهي تہ پوءِ ڪنھن نہ ڪنھن اسٽالن کي ووٽ ڏيڻو پوندو. ڇا توهان وٽ ڪو ٻيو بھتر متبادل آهي؟ هاڻوڪو وزيراعظم صاحب ڪيترو بہ ”لوهي هٿن وارو“ ڇو نہ هجي، هو پاڻ پراڻو ڦٽ آهي جيڪو پاڻ هڪ پيڙا آهي. اسان کي فولادي چنبا ان ڪري ڪو نہ گهرجن جو اهو جمهوري سيٽ اپ کان ٻاهر جو حصو آهن. اسان کي جمهوريت گهرجي جيڪا سختيءَ سان نافذ ٿئي. ان لاءِ هڪ عدد نہ پر وڌ ۾ وڌ ۾ اصول پرست منتظم گهرجن. هر اداري ۾ ايماندار اصول پرست رکڻو پوندو جيڪو سياسي مداخلت ۽ ڪرپشن خلاف بي رحميءَ سان جراحي ڪري!

منھنجو هڪ عزيز ڪجھہ سال اڳ ايران جي ننڍڙي ڳوٺ ارسنجان ۾ ملازم هو. کيس ڪو مسئلو حل ڪرائڻ لاءِ شيراز آفيس وڃڻو پيو. هو صبح جو ويو ۽ شام جو ڪامياب موٽي آيو. اهو ڪم پاڪستان ۾ 6 مهينن ۾ٿيڻ ممڪن ڪو نہ هو. هن ٻڌايو تہ ڀائو جڏهن آئون واسطيدار وزير وٽ پنھنجي مسئلي بابت درخواست کڻي ويس تہ هو موجود ڪو نہ هو پر سندس جاءِ تي بااختيار آفيسر نمبر2 کي ويھڻو هو. اتفاق سان اهو بہ موجود ڪو نہ پر ٽيبل تي پھتل سڀ درخواستون بااختيار عملدارنمبر 3 اڪلائي ڇڏيون ۽ فيصلو لکي ٺپو هڻي ڏنائين تہ هي مسئلو هن ريت حل ڪري ان جا آرڊر هٿئون هٿ ڏئي ڇڏيو. ٻي ٽيبل تي ويٺل عملدار حڪم نامو/فيصلو درج ڪري ٺپو هڻي درخواست گذار کي هٿ ۾ ڏنو ۽ چيو تہ وڃي ارسنجان جي امام صاحب کي ڏي!

اهو آهي سسٽم! پر هتي ماڻهو هڪ معمولي ڪم لاءِ هفتا، مهينا ۽ سال ڌڪا کائيندا ٿا وتن. ڇا آئون اهو پڇي سگهان ٿو تہ وزير يا سيڪريٽري صاحب جي غير موجودگي سبب عوام کي تڪليف ڇو ٿي ڏني وڃي ۽ معاملو اتي جو اتي ڇو نٿو اڪلايو وڃي! عوام کي آزارڻ وزيرن ۽ ڪامورن جي عادت بڻجي ويو آهي ۽ ان کي سندن ”شان“ ڇو ٿو سمجهيو وڃي ادا ”مٿان“ کي سندن نالائقي ڇو نٿو سمجهيو وڃي؟ اهم ڳالھہ اها آهي تہ انھن ڪيترو ڪم اڪلايو ۽ سسٽم کي ڪيترو بھتر کان بھتر ۽ تڪڙو ڪيو. عوام کي ڪيترو سک پھتو. ضروري آهي تہ روز مره جا ڪم وزيرن ۽ سيڪريٽرين، ڊائريڪٽر جنرلن ۽ ڊائريڪٽرن ڏانھن خود (جيڪو بہ وقت سر موجود هجي) منتقل ٿي وڃن. جيڪڏهن ايئن ناهي ڪرڻو تہ پوءِ وزيرن ۽ آفيسرن جي فوج رکڻ جي ڪھڙي ضرورت آهي؟ سڀ ڪم صدر صاحب پاڻهي پيو اسلام آباد مان ڪندو.