... ۽ هاڻي سنڌو ماٿري دنيا جي ايجنڊا تي

ن جا دورا (پاڪستان ۾) فوجي ڪارروائي کانپوءِ اعليٰ سطحي ضرور آهن. پر اهو نہ سمجهيو وڃي تہ پاڪستان سان معمول وارا لاڳاپا بحال ٿي ويا آهن.“

هوڏانھن آمريڪي ڊفينس چيف، پاڪستان جي چيف ايگزيڪيوٽو کي اهو چوڻ اچي رهيو آهي تہ ”مسٽر چيف ايگزيڪيوٽو اسان کي فوجي حڪومت قبول نہ آهي ۽ اسان جمهوريت جي بحالي چاهيون ٿا.“ پاڪستان جو چيف ايگزيڪيوٽو اها تنقيد ڏاڍي ڪشاده دليءَ سان ٻڌندو. پر نراڙ بدران دل ۾ گهنڊ وجهي چوندو: ”اڇا اڇا ٺيڪ هئي، تم جاؤ!“ پاڪستان ۾ اڳ بہ ڪيترا انگريز ۽ آمريڪي جنرل آيا ۽ ويا، پر جنرل ايوب کان جنرل ضياءَ الحق تائين جا 22 سال (مارشل لا جا ) گذري ويا.

آئون نٿو چئي سگهان تہ ويھين صديءَ وارين مارشل لائن جي ڊيگھہ ۽ ايڪيھين صديءَ واري مارشل لا کي پاڻ ۾ ڪيترو ڀيٽي سگهجي ٿو؟ پر ايترو ڄاڻان ٿو تہ ايوب خان جي مارشل لا پاڪستان کي سوکڙيءَ ۾ ٻہ جنگيون ڏنيون ۽ ضياءُ الحق تہ ماڳهين پاڪستان جي قيام جو مقصد ئي ڦيرائي ڇڏيو. هن پاڪستان جو نالو اسلام جمهوريہ پاڪستان بدران (غير سرڪاري طور) ”ارض اسلامي جهاد“ رکي ڇڏيو هو. هندستاني صاحب پڻ خوش نہ ٿين، تہ ڪو هو سيڪيولر رهيا آهن. هو پڻ ”رام راج سامراجيہ“ جا خواب ڏسي رهيا آهن. شري رام جو راڄ ۽ خواب کڻي ڪھڙو بہ هجي، هاڻوڪن ڀارتي پنڊتن ۽ نيتائن جو ”رام راڄ“ اهو ئي آهي جيڪو پاڪستان ۾ پنجاب جي نيتائن وٽ لاهور جي بالادستيءَ وارو هليو آهي. هندستان جي پاڪستان سان دشمنيءَ جا کڻي ڪھڙا بہ ڪارڻ هجن، پر جناب سنڌ، بلوچستان، سرحد، پنجاب ۽ ڪشمير جا ملڪ ”راوڻ جي لنڪا“ ڪو نہ آهن ۽ نہ وري هنن ”سيتا ماتا“ جو هرن ڪيو آهي، جو هندستاني نيتا سنڌو ماٿريءَ کي فتح ڪرڻ جو خواب ڏسڻ لڳا آهن.

لوڪ يا سڄي دنيا ڪشمير کان سنڌ تائين واري سڄي خطي کي ڀلي تہ ڪشمير، پنجاب، سرحد، بلوچستان ۽ سنڌ ۾ ورهايل ڏسي، آئون ان کي سنڌو ماٿري ئي سمجهان ٿو ۽ جڏهن ڪو ڪشمير کان ڪراچيءَ جي ڳالھہ ڪري ٿو. اها مون کي سنڌو ماٿريءَ جي ڳالھہ لڳي ٿي. اڄ جڏهن برطانيا ۽ آمريڪا، هندستان ۽ پاڪستان ڳالهين ۾ اڙيل آهن. تڏهن مون کي پنھنجي سنڌو ماٿريءَ جو مستقبل خطري ۾ نظر اچي ٿو، جنھن تي جنگ جا بادل مڙي رهيا آهن!