2020-11-06
داخلا نمبر 1283
عنوان 1. اي دوست!
شاخ پيهي منجهه پاڻ
پڙهيو ويو 1343
داخلا جو حوالو:
هن داخلا جون تصويرون نه مليون
اي دوست !
مونکان منهنجو نالو نه پڇ ڇو ته منهنجو نالو آهي ئي ڪونه! تون مون کي جنهن به نالي سان سڏيندين، اهو ئي منهنجو نالو آهي.
دنيا مون کي جنهن نالي سان سڏي ٿي، اها ته هڪ نالي ماتر سڃاڻپ آهي. تون ڀلي مون کي ان ئي نالي سان سڏ، ان سان ڪوبه فرق نٿو پوي!
اي دوست ! مون کان منهنجي ذات به نه پـُــڇ! گھڻو زور ڀريندين ته آئون هٿ ۾ مٽيءَ لــپ ڀري چوندس،” اِجهو! هيءَ آهي منهنجي ذات!“
مون کان منهنجو وطن به نه پڇ ڇو ته سڄي ڪائنات جي هڪ هڪ ڪنڊ منهنجو وطن آهي. هر ماڳ منهنجو آهي، پر منهنجو ڪٿي به ٽـِـڪاڻو ڪونهي ڇو ته آئون ازل کان ابد جو مسافر آهيان.
منهنجو ديس تمام وشال آهي پرآئون آديسي آهيان. منهنجي من ۾ ديس ، اَديس ۽ آديس جو فرق ناهي بچيو.
تون منهنجو ڏس پتو پڇي ڇا ڪندين؟
تون مون سان منهنجن خيالن تي بحث ڪري ڇا ڪندين؟
منهنجا خيال منهنجا ته آهن ئي ڪونه! آئون فقط اهو ئي چوان ٿو جيڪو منهنجن خيالن ۾ آندو ويو آهي. منهنجيون تحريرون منهنجيون ته آهن ئي ڪونه ، مون اهو ئي لکيو آهي ، جيڪو مونکان لکايو ويو آهي!
منهنجي هٿ سان ٿيل ڪم مون ته ڪونه ڪيا آهن.
منهنجي پيرن جو ڪيل پنڌ مون ته ڪونه ڪيو آهي.
هن ڪمزور جسم کي ڪهڙي طاقت آهي جو جبل چڙهي، درياهه جهاڳي ۽ صحرا اُڪري وڃي! هن ڪمزور دماغ کي ڪهڙي طاقت آهي جو منزلن جو پتو لهي؟ ... ۽ درست ڏس ۾ سوچي ڪا وک کڻي سگھي!
حوصلو ۽ همٿ ، ڏس ۽ پتا ڪير ٿو ڏئي؟
شوق ۽ عشق ڪير ٿو پيدا ڪري؟
مون کان منهنجي عمر به نه پـُـڇ ڇو ته تنهنجي ۽ منهنجي عمر ساڳي آهي. تون ظاهري طرح مون کان پنجاهه ورهه ننڍو هجين يا پنجاهه ورهه وڏو! تنهنجي ۽ منهنجي، بلڪه اسان مان هر هڪ جي عمر ساڳي آهي.
ڇا توکان ”عهد الست“ وارو وقت وسري ويو، جڏهن پاڻ گڏ هئاسون!
ازل کان ابد تائين جي هن سفر ۾ ڌرتيءَ جي پليٽفارم تي ڪو اڳ لٿو يا پوءِ، ان سان ڪهڙو فرق ٿو پوي؟
اي دوست! مون کان ڪجهه به نه پڇ،
پنهنجو پاڻ ۾ پيهي وڃ، توکي سڀ ڪجهه پنهنجو پاڻ معلوم ٿي ويندو.