ابڙو اڪيڊمي Abro Academy
2020-11-06
داخلا نمبر 1284
عنوان 2. دعا
شاخ پيهي منجهه پاڻ
پڙهيو ويو 1494
داخلا جو حوالو:
هن داخلا جون تصويرون نه مليون
دُعــا
اي زبردست ۽ لاشريڪ!
سرجڻهار، پالڻهار، اڪيلا ۽ سڀ کان مهربان!
هن منڊي ماڪوڙيءَ جو سجدو قبول ڪر!
بي شڪ! پاڪ آهي تنهنجي ذات ۽ آئون ظالمن مان آهيان.
بي شڪ! تون احد آهين، بي نياز آهين، نه تون ڪنهن کي ڄڻين ٿو ۽ نه ڪنهن مان ڄائو آهين.
تون هميشهه هئين، هميشهه آهين ۽ هميشهه رهندين!
تون عرش عظيم تي به آهين، صحرائن ۽ پاڻين ۾ آهين، کيتن ۽ گلن ۾ آهين، روشني ۽ آواز ۾ آهين.
تون اونداهين ۾ به آهين، غفائن ّ ۾ به، ۽ پولارن ۾ به آهين.
تون رڳو اتي ئي ناهين جتان جي مون بي سمجهه کي سمجهه آهي پر تون اتي به آهين جتي منهنجي سوچ ته ڇا جبرائيل جي پرواز به ناهي.
تون هر شئ ۾ آهين، هر شئ کان ٻاهر آهين ۽ هر هنڌ آهين،
تون آواز آهين ۽ تون ڪائناتي شعور آهين.
تون خبير آهين، بصير آهين، سميع آهين، عليم آهين ...
... ۽ آئون جَــهَــل جي ريگستان ۾ ڀٽڪندڙ ”ڪجهه به نه“.
اي بي حد ۽ لاشريڪ!
آئون تنهنجي نانءَ ۽ تنهنجين سمورين صفتن کي سجدو ڪريان ٿو.
منهنجا هٿ دعا لاءِ کڄيل آهن ۽ سر تنهنجي آڏو جهڪيل آهي. مون پنهنجو پاڻکي تنهنجي سپرد ڪيو.
آئون اڻڄاڻ آهيان ۽ نٿو ڄاڻان ته منهنجي حق ۾ ڇا ٺيڪ آهي ۽ ڇا ناهي!
آئون نٿو ڄاڻان ته تنهنجي بي حساب پناهه، معافي، شعور، امن، رحمتون ۽ بندگي ملڻ کانپوءِ آئون باقي ڇا گھران؟
انڪري، آئون توکان، توکي گھران ٿو.
تـُـنهنجي قربت گھران ٿو ۽ انهن جي محبت گھران ٿو، جن سان تون محبت ڪرين ٿو.
اي بي حد ۽ لاشريڪ!
تـُـنهنجي آڏو دعا لاءِ کنيل هي هٿ ڪنهن ٻئي جي آڏو محتاجيءَ ۾ نه کڄن!
تنهنجي آڏو جهڪيل هي ڪنڌ ڪنهن ٻئي جي آڏو نه جهڪي، نه شرمساريءَ ۾، ۽ نه بيوسيءَ کان، ۽ نه ڪنهن ٻئي سبب کان!
تنهنجو ئي خاڪي بندو.